Vanzang Christmas
Vanzang ciruang Lai hritlai hna
Lung a leng tawn hlan lio caan hna
Tlangzaar an par Christmas a nai
Kumpi kum khat kan hngah hlangmi
Christmas sunglawi Lung rawn khua ah
Hmanlio caan kha ka ngai ruangmang
Khuadei hlanah khuari thawngbang
Hrencia kikawng an kah thawng nih
Hngakchia upa kan hlau tawn maw
Phak chialmal in chawlhnah sam le
Tutuhlut cuh, sachungril siam
Lensai lei ah paiper bei he
Far hnah phah cia chumtual rawn ah
Lunglawmhnak ni tawite tiin
Zaihla remh le khuang le lam he
Pathian thangthat a nuam kan ti
Thangthat cim lo lengkhawmh nakah
Lam le kui le holhtheih lo he
Har kiangkam ah patung cheukhat
Nutung rual zong buh chumhchuan ah
Chunhthah rawlchuang nuam ti cio hna
Kanzuat uitum runrual tiang nih
Saruh tum cuh sarim tlan in
Nuam ti ve hna Khamhbawi chuah ni
Lai chuanrawl kha zeinih tluk hlah
Lai lengkhawmh kha zeinih tluk hlah
Lai Christmas kha zeinih tluk hlah
Lungrawn khuakhirh caan um hram seh
Immanuel Khamhbawi thawngin
Kan hlam ruangmang Vanzang Christmas