Ka Thlarau Ca A Tha
05/09/2012 23:14
Ka Thlarau Ca A Tha
Kolos. 3:1-2
Nannih cu Khrih sinah nunnak ah thawh nan si cang. Cucaah Pathian orhlei kam i Khrih nih a bawi ṭhutdan cung i a ṭhutnak vancung khua chung i a ummi thil tu kha nan lung in i seh chih hna u. Hi vawlei cung thil hi si loin khika thil tu kha ruat hna u.
Matthai 10:28
Pum cu a that kho ko nain thlarau a that kho lomi cu va ṭih hlah u; hell chungah pum he thlarau he a that khotu Pathian tu kha va ṭih u.
Chicago khua ah hin sihni pa pakhat, Pathian zong a tihzah mi a si pinah mirumngai zong asi mi Horatio Gates Spafford an timi pa a rak um. A nupi minah Anna asi i fapa pa(1) le fanu pa(4) an rak ngeih hna. 1870 kum hrawng thok hin an in chungkhar ah vanchiatnak nih a tlun hnawh hna. Ahmasa bikah an fapa fangkhat nih malaria zawtnak in a thihtak hna. Cu hnu kum khat a rauh ah Chicago khua meinih a rak kangh lio kha asi i a rumnak a neihchiah cu meinih a rak kangh i tampi sunnghnak a rak tong than. An fapa thihnak le an sipuazi sunghnak hnem tu talah asi hnga maw tiin kan thaw kan i chuah lai tiah England ram ah inchungkhar holiday kalding in timhlamhnak an rak ngei. Spafford cu a riantuanmi laklawhnak ruangah a nupi le a fa nu pa(4) hna cu anmah lawng rak kal chung dingin a timhlamhpiak hna i a mah lawng nih a hnu ah hei dawi te hna dingin ai tim. A nupi le a fanu le cu tinbaw in nikua an lak hnu 1873 November thla ni (2) ah an i citmi tinbaw cu tinbaw dang he ai pah caaah an fanu dawt pali hna cu Atlantic rili pi ah an nunnak a liam. Cu thawngcu a nupi Anna nih Spafford sinah thirhri a hei tuk i na fanu le cu an pali ning in rilipi ah an thi dih i keimah lawng ka him tiah a hei thanh. Cu ca a muh le cangka in Spafford cu a nupi Anna hnem dingah tinbaw pakhat in a va fuh colh hna. Ai citmi Tinbaw captain pa nih spafford cu hika hi na fanu le an pamnak hmun cu asi tiah achimh. A fanu le an thihnak rilo cung an tan cuahmah lioah cun hla fungkhat a phuah. Cucu ‘Ka thlarau ca a tha’ tiah ZBC hla number 332 I kan sak tawnmi khi asi. Cangkhat nak le nolhnak telawng ka van tial lai.
1. Tidai bantuk in ka lam a daih tik le
Ngaihchiatnak tilet thawh tikah
Zei kip si hna seh ka cung a tlungmi kha
Ka thlarau caah an tha dih ko
Ka thlarau ca a tha
Ka thlarau ka thlarau ca a tha
Spafford nih a tonmi thil hna hi a pumsa caah cun ngeihchiat lungkuainak lawngte an si ko. A fapa dawt nih a thihtak hna, an mitthli hmanh hul hlanah an neihchiah meinih a kanghdih, cu tlawmpal a rauh ah a dawtukmi a fanu pa (4) hna nih voikaht loah rilipi ah an lohtak tikah tuar khawh lomi ngeihchiatnak, fahnak asi ko. Sihmanhsehlaw, Spafford nih cun ka thlarau caah a tha dih ko tiah ati i hi hla hi a phuah khawh. Maw ka nunnak bawipa cu thangthat tuah ati khawh. A pumsa ca nakin a thlarau caah khua aruat deuh mi pa asi ti a lang. Taksa sining lawng in tuakah cun Pathian volhpamh hmanh a fawitemi asi.
Minung tampi nih cun kan tonmi sunghzatlak nak ruangah, harnak ruangah, fahnak ruangah Pathian kan mawhchiat theo tawn. Asinain kan tonmi harsatnak hna hi voitampi cu kan thlarau caah a thabik an rak si tawn. Rom 5:3 ah cun ‘Cun harnak kan inmi zongah hin kan i lawm ko, zeicahtiah harnak nih cun in khawhnak kha a kan ngeihter i 4in khawhnak nih cun ziaza a kan ngeihter i ziaza nih cun ruahchannak kha a kan ngeihter; ruahchannak nih cun a kan deuh lo’
Kan pumsa nakin kan thlarau hi kan dawtdeuh awk asi. Zeicatiah pumsa cu vawlei ah chikkhat kan nunchung ca lawng asi i kan thlarau cu thih a thiam lo, zungzal in a hmunmi asi. Cucaah cun hi vawlei kan nun chungah hin kan ral tihnung bik hna cu kan pum a that kho tu, kan pum hnahnawhnak a kan petu nakin kan thlarau a that khotu le kan thlarau a kan hrawk khotu thil hi kan tih deuh hna awk asi tiah Matthai 10:28 ah a kan cawnpiak nak hi asi.
Vawlei pum he ai pehtlaimi thil poah hi kan caan sau a hmun dingmi zeihmanh an um lo. An hmunh bik ah hi vawlei cung kan nungchung kum 50-60 chung te hi asi lai i kan thih hnu ahcun kan i ken khawh dingmi zeihmanh an um lo. Khua kan khan tikah nikhat ca nakcun kum khat ca cu a biapi deuh ah kan ruah zungzal. Kum 50-60 ca nak cun zungzal ca cu a biapi deuh ah kan ruah ve awk asi. Caan khat telawng a hmun dingmi ca i fak tuk khuaruah le kan lungthin kan ruahnak va chiah dih khi Bawipa nih a kan sianlo caah ‘van lei thil tu kha va ruat u’ tiah a kan tinak asi.
Kan thlarau caah thil tha chuah khawhnak ding caah a caan ahcun kan pumsa caah fahnak, ngaihchiatnak, sungh zatlaknak, teminnak le harsatnak a phunphun zong kan ton ve ko. Nain cu thil hna cu Pathain nih kan caah a tha lei ah a kan merpiak khawh dih. Minung mithmuh ah cun an tha lo zong asi ko lai zeicatiah thlarau thil cu minung mit in hmuh khawh an si lo. Rom 8:28 'Pathian nih hin, amah a dawmi hna caah le amah nih aa tinhmi ningin a kawhmi hna caah cun, zeizong vialte hi a ṭha lei ah a serpiak ko hna ti kha kan hngalh' Kan thlarau ca hi Pathian nih cun biapi ah a chiah. Zecatiah kan thlarau cu zungzal caah asi. Kan cahrang ah thil tha a thei deuh tucu Pathian asi. Pathain khuakhan ning tampi cu na caah a tha na ti khawh lomi tampi a um men ko lai zeicatiah nang nih cun titsa caah na ruah i Pathian nih cun na titsa ca nakin na thlarau caah biapi deuh in a ruah caah asi. Kan tonmi thil kipah Pathian lawm ko hna u sih.
A tanglei tlawmpal hi kanmah le kan mah hi hal hna u sih.
1. Nifa te ka khuaruahmi ah hin chikhat te lawng ca asimi ka pumsa ca lawngte ah khua ruat in zungzal a hmun dingmi ka thlarau caah caan pek ka daithlang sual maw?
2. Ca ka relmi ah hin teh ka thlarau caah a thami maw ka rel atam deuh vawlei thawngpang le thil dangdang dah?
3. Ka inn chung le ka motor chung hna ah hla ka chuah tikah ka thlarau caah athami Pathian hla hna maw ka ngeih a tam deuh vawlei hla dah?
4. Hawi he kan i ton i bia kan i ruah ah hin teh kan thlarau caah a tha dingmi Pathain kong maw kan ceih tam deuh vawlei kong dah?
5. Kan fale caah saduh kan thahmi ah hin teh an thlarau ca maw kan ruah deuh vawlei ah fimnak, thiamnak le rumnak a ngeimi an si khawhnak ca dah kan ruah deuh?
6. Khrihfabu pakhat ah member kan lak tikah teh kan thlarau caah a tha lai ti zoh in maw kan I thim asi loah luhmuhzi ruah deuh ah dah?
7. Rian kai thim tikah teh ka thlarau caah a tha dingmi pumh khawmh nak caan hna a um deuh ding rian hna maw kai thim maw ka pumsa thanchonak ca lawng zoh in dah kai thim?
Vawlei kan nun chungah pawcawmnak, fimnak le thiamnak hna hi an biapi tuk ve ko. Nain hi thil hna cu a hmun dingmi an si lo. Va hmun hmanh hna sehlaw kanmah lila hi kan hmun lai lo. Nikhatkhat cu kan kaltak te hna lai. Zungzal a hmun dingmi cu kan thlarau hi asi i hi kan thlarau caah hin kan nunnak le kan caan tha hna hi hmang deuh hna u sih. Kan tonmi thil kipah 'Amen' ti ko hna u sih zeicatiah kan thlarau caah an tha dih ko.